ഭാരതീയ വ്യോമസേനയുടെ ജന്മദിനം

1932 ഇല്‍ ഈ ദിവസമാണ് റോയല്‍ ഇന്‍ഡ്യന്‍ എയര്‍ഫോഴ്സ് എന്ന പേരില്‍ ഭാരതീയ വ്യോമസേന തുടങ്ങാനുള്ള തീരുമാനമായത്.അഞ്ച് പൈലറ്റുമാരും നാലു വിമാനങ്ങളുമായി തുടങ്ങിയ അത് ഇന്നു ഒരു ലക്ഷത്തിലധികം അംഗസംഖ്യയും എണ്ണൂറിനു അടുത്ത് വിമാനങ്ങളുമായി ലോകത്തിലെ നാലാമത്തെ വായുസേനയായി മാറിയിരിക്കുന്നു.

1948,1962,1965,1971-ലെ യുദ്ധങ്ങള്‍.കാര്‍ഗിലിലെ പ്രഘ്യാപിക്കപ്പെടാത്ത യുദ്ധം,ആദ്യമായി ശൂന്യാകാശത്തേക്കു പോയ വൈമാനികന്‍.ശ്രീലങ്ക സമാധാന സേനക്ക് സഹായം.മാലിദ്വീപിലെ അട്ടിമറിക്കാരെ തുരത്തല്‍ അങ്ങിനെ തൊപ്പിയില്‍ തൂവലുകള്‍ ഏറെ.

22 സ്ക്വാഡ്രനുകളിലായി പലതരം യുദ്ധമിമാനങ്ങള്‍ വിന്വസിച്ചിരിക്കുന്നു. SU- 30 മുതല്‍ പഴയ പടക്കുതിരയായ മിഗ് 21 വരെ .പിന്നെ ജഗ്വാറുകള്‍,മിറാജ് 2000.മിഗ്-23,27,29.

എയര്‍ ചീഫ് മാര്‍ഷലിന്റെ (ആര്‍മിയിലെ ജനറലിനും നേവിയിലെ അഡ്മിറലിനും തുല്യം) റാങ്കിലുള്ള ചീഫ് ഓഫ് എയര്‍സ്റ്റാഫിന്റെ കീഴില്‍ അലഹാബാദ്,ഷില്ലോങ്ങ്,ന്യൂ‍ ഡെല്‍ഹി,തിരുവനന്തപുരം,ഗാന്ധിനഗര്‍,നാഗ്പൂര്‍,ബാംഗളൂര്‍ എന്നീ സ്ഥലങ്ങളിലുള്ള ഏഴ് കമാണ്ട് ആസ്ഥാനങ്ങളാണ് ഉള്ളത്.

എയര്‍ഫോഴ്സ് വിമാനങ്ങളില്‍ ഉപയോഗിക്കുന്ന ചിഹ്നം।

ഇന്‍ഡ്യയിലെ -ആദ്യത്തെ ജെറ്റ് യുദ്ധവിമാനം - വാമ്പയര്‍

ഇന്‍ഡ്യ സൂപ്പര്‍ പവര്‍ ക്ലബിലേക്ക് കുതിക്കുമ്പോള്‍ , ഒരു പാടു സ്വപ്നങ്ങളും യാഥാര്‍ത്ഥ്യങ്ങളുമായി സേന സാരഥിയാകട്ടെ।ഇന്‍ഡ്യയുടെ വ്യവസായ താല്‍പ്പര്യങ്ങള്‍ക്കു കാവലായി വിദേശ രാജ്യങ്ങളില്‍ സ്റ്റേഷനുകള്‍,ന്യൂക്ലിയര്‍ വാഹക ശേഷിയുള്ള വിമാനങ്ങള്‍,ചന്ദ്രയാന്‍ എല്ലാം അവയില്‍ ചിലത് മാത്രം.മുന്‍പേ പറന്നു പോയവരുടെ ആത്മാര്‍പ്പണങ്ങളില്‍ നിന്നു ഊര്‍ജ്ജം ഉള്‍ക്കൊണ്ട്,പ്ലാറ്റിനം ജൂബിലിയുടെ നിറവില്‍ നില്‍ക്കുന്ന ഭാരതീയ വ്യോമസേന ഇനിയും മുന്നോട്ട് കുതിക്കട്ടെ.ആകാശം പോലും അതിര്‍ത്തിയാകാതിരിക്കട്ടെ.

വാല്‍ക്കഷ്ണം.

റോയല്‍ ഇന്‍ഡ്യന്‍ എയര്‍ ഫോഴിന്റെ ആദ്യത്തെ സ്ക്വാഡ്രന്റെ തുടക്കം 1933 ഏപ്രില്‍ ഒന്നിനായത് കൊണ്ട് കുറെക്കാലം ഏപ്രില്‍ ഒന്നിന്നു വ്യോമസേനാ ദിനം ആഘോഷിച്ചിരുന്നു.വിഡ്ഡികളുടെ ദിനത്തിന്റെ കൂടെ ആഘോഷം നടത്താനുള്ള വൈക്ല്ഭ്യം കാരണം പിന്നെ RIAF act നിലവില്‍ വന്ന ഒക്ടോബര്‍ മാസത്തിലേ എട്ടാം തിയതിയിലേക്കു മാറ്റുകയായിരുന്നു എന്ന് കേട്ടിട്ടുണ്ട്.

ചിത്രങ്ങള്‍ക്കു ഡിഫന്‍സിന്‍ഡ്യയോട് കടപ്പാട്.